歸家
終於搬左返屋企lu~~
上個星期六晚，我就要返工
放左工，買飯返去同小新食，結果，我地兩個係launch食完飯，仲睇晒成套新紮師妹先至各先返房
吳彥祖真係好靚仔呀，戲人既佢，簡直就係一個無得頂既男朋友呀!!!
不過，我都明白，係睇戲，現實同想理始終都會有距離
如果唔係，就唔會有現實同想理之分啦
夜晚，我地出左去金滿庭食糖水
發生左一件好搞笑既事
老闆娘：(同Max講)嘩，你做乜瘦左咁多呀？因為讀書既事，定係感情事呀？
我地成班：哈哈哈哈，兩樣都係
轉個頭，老闆娘拎住一個心型既龍眼啫哩黎，放係Max面前
老闆娘：我送個心俾你食啦，好快無事架啦
老闆娘離開後
Max : 喂，食唔食呀，試下呀？
我地：唔好啦，食左無拖拍架
我：你仲要切碎個心黎食喎，真係心碎
我地成班：勁笑XDDDDDDDDD
Max就緊係無野講，埋頭食野啦
笑死我地呀，不過點都好啦，希望佢快D無事啦
--
到左尋日
唉......
白痴既事情又發生係我身上啦
一早，我就緊係起身執野啦
Raymond黎幫我車走
咁由於我將架車仔借左俾Decem，咁我地兩個就拎住D輕既野落去先啦，咁諗全上左D大件既野先，所以將我地手上既野放低左係一大埋行李度，叫阿Kit睇住先啦，因為佢要等浩賢揸車返黎，所以係大家搬野既時候，就幫大家睇住D野
咁到Decem還野架車俾我，我地就將其餘既野推埋落去，上埋車就走啦
返到我屋企o個邊，我同埋我屋企人去飲荼先啦
飲完茶，就由我既阿爸阿媽，仲有我細妹同我一齊搬野返屋企啦
就o係呢個時候，我發現，少左幾袋野!!!!!!!!!!正正就係阿Kit幫我睇住o個幾袋
好明顯，我唔記得拎返上車
我就緊係即刻打俾浩賢啦，原來發現既時候我已經走左啦，佢就幫我車左D野返佢屋企，佢話反正我之後都要去佢度拎返部電腦(至於點解我部電腦係佢度，就唔好提啦，唉...)，到時一次過拎
我真係白痴得死呀，我o個一刻真係灰左，好在o個D都唔係好重要既野。之但係，我都唔係好接受到我自己咁白痴...... 實俾佢地笑死啦......
返到屋企，就緊係執返晒D野出黎啦
結果，我間房，差D行唔到入去
哈哈哈哈哈哈哈哈
執野執左好耐呀，執到我暈暈地，本身又唔夠訓喎，結果咪就係我返教會既時候釣魚lor......
返屋企住，大家同我自己都真係唔係好慣
要從新適應
--
今日，呵呵呵呵，訓到兩點先起身
跟住就返工，到而家啦
係呀，我又係o係公司打日記呀
呵呵呵呵
今日係公司好好好忙呀
做到我好支力
頭先，仲係我已經手軟腳軟既時候，發生左D好恐怖既事件
有隻飛蟑螂由走廊飛左入黎office呀o係無人幫到我既情況我又唔想同佢單打獨鬥(雖知道，呢度連窗都無隻)咁我就唯有打落管理處求救佢地派o個個人上到黎隻野已經飛左出走廊啦o個個人好好野咁一下就KO左隻飛蟑螂啦真係好恐怖呀......
唉......
差唔多放工啦
約左我細妹去食糖水
好明顯，就係我又要負責俾錢啦......而家做家姐真係命苦
離開宿舍前夕
我又o係公司打日記啦
星期四晚唱K唱到三點幾先返hall
尋日訓到成兩點先起身
跟住就緊係要pack野啦，聽日要搬走啦
pack到差唔多五點，先pack左五個膠箱
我都唔明我邊度得黎有咁多野架
我pack八箱野寄存o係hall，都仲有兩大袋紅白藍拎走(只係保守估計，至於結果係點，我都唔敢想像)
跟住我地就出左去啦
我地去左邊？經典lor
我地由九龍塘出發，去到中環轉巴士，由於好塞車，塞左好耐就去到淺水灣，去到觀賞左一陣天然現象--暴雨，行雷同閃電，跟住就返落銅鑼灣食韓燒啦
係唔係好經典呢
其實我地離開九龍塘既時候都只係陰天，去到中環好鬼大雨啦，我地原本諗住去赤柱BBQo架，不過見到咁大雨，就諗住去淺水灣，因為據聞o個度有間燒烤既鋪頭，應該有瓦遮頭。
又由於阿韾因為早到既關係，就好勇咁一個女仔o係大風大雨及好黑及四顧無人既情況下，獨自探路，仲要去7-11度買埋遮俾我地(我地一落車的時候，係3女4男2把遮，淋到濕晒，仲要冷風陣陣，凍到我死)。之後，經浩賢同herry探之後，我地發覺o個間野原來係無開，我地係淺水灣既公廁門口影左幾張相，就出左銅鑼灣食飯，為左完成我地BBQ既心願，我地就去左食韓燒啦~~
我叻左呀，淨係暈車浪，無嘔
但係有幾個位，真係差D嘔lor
包括：
1) 小新同我講：阿Max好愛你呀......
2) Kit : 小新同Michelle 好似情人咁打情罵俏
3) 小新同我講：你嘔既時候，同阿Max咀對咀......
你話聽到呢D咁既野既時候，邊有可能唔嘔呀?!
愈來愈覺得，我地成班，真係無得救，冒雨踩單車，入淺水灣睇雷電...... 我諗我以前真係無咁顛架......
夜晚返到hall，我又繼續執野，執到三點幾先訓
佢地成係十五樓玩啤牌，如果我今日唔係一早要返工，我都會玩架
今日，要麻煩Max幫我將D野推上十九樓，再幫我D行李辦埋寄存手績
好忙好忙好忙呀今日
呢篇野我繼繼續續打左兩個幾鐘先打完
今日一來開新班，二來有另外一班完，又好鬼多電話喎
搞到我團團轉，成日都無停過手
--
都唔明D人架
報course都仲諗住講價，問有無折，又會問兩個人報有無折，又會問如果我讀兩次有無折，你估而家街市咩，有得講價，無奈......
--
仲有四個幾鐘先放工，我就黎悶死啦
--
聽日我地就要離開hall啦
今晚又話去食糖水喎
我地考完試真係勁玩
玩呀玩呀玩~~
玩同玩同玩同玩
我地呢幾日
依照我地既原定計劃
玩得都幾盡
星期二，我地既計劃係去踩單車
一早起身既時候，見個天好灰暗，我同Decem都建議先進行室內既活動，例如保齡球或者蹓冰，之後揾日好天先踩單車，但係班猛男們話落雨都唔緊要，豁出去。
跟住，我地就起行啦，去到沙田，已經落緊雨啦，但係我地都係決定依照原定計劃行事。
我地踩左一分鐘，就開始下起傾盆大雨，真係好大好大好大好大好大好大好大下架，我地都未出到城門河，就已經濕晒啦，D雨入眼入到我乜野都睇唔到，加上我暈車浪仲未暈完，唯有慢慢踩，佢地就緊係拋離左我啦，踩下又停下等我咁啦。不過我地去到吐露港公路中段就已經停雨啦。之後去到大埔，我地就去左吉之島food court食飯，係午飯既時候，我去左兩次洗手間，我D衫褲鞋襪全部都扭得出去架，我完全感受到我係一隻好濕好濕既泥鴨，我成個人好似重左十幾磅咁，因為我條牛仔褲超級吸水，搞到我踩得好辛苦，因為條牛仔褲黏實左隻腳，每踩一下都好辛苦，要同條褲鬥力。
食完飯，呵呵呵，我地就回程啦，去到一半，由小新叔叔駕駛既雙人單車上既乘客，就變左係我啦，因為我實在已經好嬲啦。坐雙人單車後座好開心，因為小新叔叔真係好搞笑，我地下落大斜，又上大斜，刺激完就要好努力好努力咁踩返上斜坡。不過我證實左一樣野，踩雙人單車既後座，其實仲嬲過自己一個人踩，不過由於我係第一次踩雙人單車，所以覺得好得意。
返到沙田，就開始有D小意見發生啦，Max架單車甩鍊(其實，如果唔係佢同我換左車，甩鍊o個個就係我啦，我踩到咁上下都話架單車條鍊有問題架啦，又無人信我喎，哼~~)，仲有Herry同雙人單車既司機浩賢發生輕微碰撞，浩賢隻手指少左一忽肉，仲話係地下見到忽肉，諗起都恐怖，好在我見唔到咋。不過最重要都係大家平安無時~~
之後，我就濕住咁返工啦
好在我平時會擺一套衫係公司，咁先唔係濕足一日
--
星期三
我地既計劃係首先去打保齡球，然後去浩賢屋企打機
我一早已經諗住唔去打機架啦，我呢D打機白痴，無謂拖低個分呀
但係，係一早，我起身既時候周身骨痛，特別係個pat pat真係好痛，(架單車個坐位好唔舒服呀>.<)我就係去到lu
到午飯時間，去左做job食Pizza Hut
之後出去搞左D野就返左hall lu
--
到今日
我做左一個創舉(對我個人黎講)
我尋晚四點幾先訓得著
七點半竟然起到身
仲要可以好快手咁梳洗完(大家都知啦，我要沖涼洗頭架嘛~~)
八點半就返到BU
咁Language Centre就緊係開九點啦
我就去食左個早餐先去做我要做既野
跟住返SU同Fion傾左住
返hall搞埋D野
就又同佢地出左去玩啦~~
今次，我地係去又一城蹓冰
雖然我都唔係好叻
不過至少有roller既底，又係第二次蹓冰
所以都ok既，仲可以幫下其他同學仔
我地蹓左幾個鐘
對腳就當然好嬲啦，但係隻右手D肌肉都好痛呀
因為拖住Decem & Max既時候
佢地都幾借力，我就要好用力
結果，就緊係酸痛啦
不過見到Dece, Max, Siu San由唔識都識識地
都好開心
之後兩點幾
我地去左食飯
之後我就返到公司lu
我係去食飯既時候
竟然撞到A-level時教我Bio既Miss Wong
佢對我既態度真係比以前好好多呀
PS : Max, 唔好唔開心啦，我會為你同你屋企人祈禱架。你唔開心個樣無咁靚仔呀~~
--
放工啦
又同佢地去唱K~~
Year 2 Sem 2正式終結
苦戰完exam之後
我地就繼續苦戰我地既php group assignment
不過真係多得阿Max & Herry, 佢地早我地兩日考完，佢地兩個好好好好人同埋好叻咁完成左個web site最重要既部份同埋份report
雖然之後我都要insert data, 仲要入完就俾佢地delete, 入完又delete, 入左幾次
不過相比起佢地既工作
我已經好輕鬆啦
考完試
真係好似無停過咁
今日，我去交assignment既時候
係放入個mail box o個一刻
真係有D如常既感覺
交左
就代表我既暑假正式開始啦
其實
一考完試
已經發生左好多歡樂事件啦
黎一個回顧先
20/5
一考完試
五點幾，同Decem, Samsom去食左我當日既早餐
跟住
返房hea左陣
就同Decem去左聽talk
個talk都真係有D悶
不過完左既時候
同Ludwig傾左陣
佢好似個人開心左好多
同我地傾得好開心
搞到我真係有D surprise
仲有呀，Ludwig著o個件衫真係好靚
再加上一個開開心心既佢
一個字 -- 型
夜晚，就緊係返hall苦戰assignment啦
21/5
放左工
就緊係又係趕返hall做assignment啦
晚餐既時候
就出事啦
我地叫一間不知名既pizza外賣
都幾平
不過，我地既經歷真係令人畢身難忘
1) 泰文Coca-Cola
2) 一個pizza上面有好多條梅梅地既菜 + 兩個生既雞蛋黃
3) 一個pizza既combination係 菠蘿+蕉+雞肉，D味好怪
其他o個D野食，都係怪怪的
晚飯之後
我地又繼續苦戰assignment啦
做到兩點幾
就開始幫賴雲翻譯一份report
睇我就完全睇得明既，全部都係chem既terms
不過要譯做中文，仲要係俾北京既人睇既
都真係幾高難度
結果，我做到六點幾先去訓
真係有D自己攞黎衰
不過我真係做得開心既
佢地個個係北京做得咁辛苦
我一個人通一晚頂都無所謂既
我愈來愈鍾意Greenpeace呢個機構
如果佢請我，我一定入去做
不過我睇過佢地D ad, 要三年工作經驗
22/5
返完教會
去左將軍澳開會
真係好好好遠lor
由我屋企去到將軍澳
香港咁細
係一日入面
我搭車就已經搭左兩個鐘有多啦
真係灰............
夜晚返左hall同浩賢慶祝生日
浩賢見到個蛋糕，聽到我地唱生日歌既時候
佢個樣真係好搞笑，佢完全唔識反應
個蛋糕好大個呀
我地七個人
每人食左兩件
到左兩點幾
我地正式完成我地份assignment
跟住，我地就打一隻新game啦
可惜，我係最低分o個個
無辦法啦，對住佢地一班高手
我連點玩都未學識，佢地幾個已經係個game入兩拎晒獎啦
到去攻城既時候，我見到herry既兵搬住一個好似城咁既野去攻城
我就問：嘩，你做乜搬埋個城過黎呀
Herry & Ho Yin勁笑，之後答我：井欄黎架，城...... 係呀係呀，呢個係哈爾移動城堡呀
跟住我就真係灰左啦............
今日
由於我事前張揚左話我可能會唔知醒去交assignment
Decem同Samson十一點幾就打黎叫醒我啦
不過，我都係訓返，訓到十二點幾
呵呵呵呵
跟住就去左交啦
係呢度，要多謝我所有group, Max, Decem, Ho Yin, Siu San, Herry, 咁當然仲有Karen啦，如果唔係佢，Max點會咁有動力，咁快手搞掂個site呀XDDDDD
仲有仲有，要多謝Terry呀，雖然佢最終無幫我地做到，但係佢之前俾左好多意見我地，仲俾多D reference我地參考，又俾我地煩多好耐，真係好多謝佢
黎緊幾日
我地行程緊湊
幾日內玩晒所有野
踩單車，轆齡，去沙灘打沙灘波(預計係o個下午三點，最晒既時候，氣溫三十二度既時候做架)，去浩賢屋企打機，BBQ，唱K，蹓冰
真係十分之豐富
不過由於我要返工，去唔到全部，真係可惜
Yeah~~
差唔多放工啦
係呀，我又係o係返工時候打日記呀
呵呵呵呵
PS:
今日發生左件趣事
原因從略
我：你o岩o岩先計左次咋，又計?
My boss : (奸笑)吹咩?!~(然後自己傻笑)我 即係啞左，我老細從來都無識過咁同我講野架，真係俾佢笑死
考試中場休息
又一次
返工既時候寫日記
--
一個星期無返黎
要做同跟進既野無我想像中咁多
呵呵呵呵
結果
我做左好多自己野
一口氣reply左積左個幾月
二百幾封e-mail
係睇晒同reply晒
我真係覺得自己好叻
XDDDDDDDDDDDD
其實我有帶書返黎溫架
不過無心機溫
無辦法啦
我個人就係咁架啦
唔逼到埋身
都唔去做
唉......
--
星期一至四
連續四日內考左五科
考到我死
考完之後，我簡直覺得我成個人係虛脫架
仲要同聰少出左去行街食飯
行街係行旺角好多魚賣o個條街lor
正一金魚佬黎架
返到hall
我已經支力到死啦
沖完涼
一訓
訓左12個鐘
我roommate真係羨慕死
之前幾晚
我地兩個都凌晨四點起身溫書
係我訓緊十二個鐘既時候
佢三點就要起身溫書lor
真係慘
不過佢就真係勁鬼左
尋日一考完(其實係仲有一科hea既科，so佢當自己考完左)
就一鼓作氣咁
搬左大部份既野返屋企
見到佢咁辛苦
我開始擔心我自己既情況
因為，我諗我o係hall既野係佢既兩倍
都唔知點搬好，同埋返到屋企都唔知有無位擺
灰......
--
係星期三
係電話入面
你表明左你既態度
我唔知你平時既言行
係話俾我知你掙扎緊
定係只係我會錯意
又或者你其實乜野意思都無
只係我多心
再或者
你根本意識唔到任何野
完全唔知道有D野o係不知不覺間發生左
太多uncertainty
我真係好想直接同你講
再問下你究竟點睇
但係我知我唔應該咁做
所以，我好平靜咁回應左你
真的，o個一刻，我若無其事
當然，事後
我會有好多野諗
但係點都好，我唔會俾自己一時衝動
--
呢排
唔知做乜野
真係好忙，每一日其實都有好多野要做
我知道唔同既野既priority
但係，真係多野做到，我排完priority之後，總會有D打做極都做唔到咁
我個人做野已經好快架啦
但係都係做唔晒
到底，係唔係我有問題呢？
真架，呢排真係好好好多野做
我就黎overload啦
如果我可以hang機
咁你話幾好呢
一hang左
就可以乜野都唔理
不過我知道
以我D咁理智既性格
根本唔會容許自己hang機
--
仲有兩科要考呀
FM & Logistics
兩科都係話難唔難，話易就緊係唔係易既科
唉......
