香港九龍新界一日遊
Download 返積左幾個月未download既歌，D歌手係咁出碟，就算揀完先要，我都download左幾個鐘，而家再繼續 =_=
有兩隻碟推介
1. 《不能說的秘密》電影原聲唱片
我仲未有機會去睇電影(應該都落架啦)，不過我半桶水鋼琴造詣既我，就好欣賞入面既音樂，我一向都無鍾意聽純piano多
2. 《一期一會》舞台劇原聲唱片
我相信唔係好多人有去睇《一期一會》，不過隻碟入面既歌好好聽，歌詞固然令人感慨，加上歌者觸動人心既聲音，成隻碟既歌都好令人感動，當然，我聽live時覺得正好多好多好多，場內好多人都忍唔受喊
好，講返今日既一日遊，用幾個鐘做左好多野之後，就去中原諗住睇一個我想睇既盤，俾我個朋友(都係做中原架，不過個人好老實)講中，中原真係謀人寺黎架，我前兩日send 左 e-mail去問，今日出門口之前都打左去問，佢地好肯定咁話我知個盤仲未租出去，而又可以即刻有得睇，我先出門口，點知，去到，佢地竟然話呢個盤無左，激死，又呃我！！做地產既真係信唔過，好嬲呀！！
之後因為有人遲到，我就o係荃灣行街，行到咁上下就出灣仔，點知有人又又遲到，結果我就o係灣仔周圍行，好熱好熱。
到五點，終於到啦，去左睇家居潮流博覽，無野睇既，下年唔會去lu。
之後，就去九龍灣，先去九展睇一個動漫展，雖然我唔係特別有興趣，好明顯係陪人去，不過去睇下都幾得意，亦好欣賞在場做生意既年輕人，好有創意，亦有唔錯既生意頭腦，最值得欣賞既係佢地實踐左佢地想做既野，望住佢地好落力咁叫賣，好有心機咁佈置，好認真咁去預備佢地既產品，真心祝願佢地可以有一次好好既經驗，最好緊係賺到錢啦。
九展之後，因為shuttle bus實在太太太多人啦，我地就行去MegaBox行下，B&Q真係唔錯，好多野睇，o岩晒鍾意行傢俱鋪既我，之後再去大眾行下，再周圍睇下，就去左food court 食野，一如所料咁多人，不過有樣好，food court 旁有live既冰上曲棍球睇，真係第一次咁樣食飯，都幾得意。
然後，我地又係行，行返去德福，跟住就返黎啦。行過謝瑞麟時，我終於記得去問下我隻唔o岩size，放左o係櫃桶底好耐，又無戴過既介指，原來整個ring size，由於我無單，係要錢架…… 我一直都以為，話晒都鑽介呀，應該有好好既after-sale service，免費整架嘛，我記得我幾年前拎去整係唔使錢架，不過當年有單既，鬼叫張單唔o係我手。既然要錢，我又未諗到有乜野機會要戴，再拖下先啦，諗住拎出黎戴先拎去整啦。或者等我問下可唔可以賣返俾佢，再買過第二隻先，得就好啦，hee hee
就係咁樣，我今日既路線係：觀塘 à 大窩口 à 荃灣 à 灣仔 à 九龍灣 à 大窩口，我都覺得自己好厲害，哈哈……
posted by Michelle 阿米 @ 8/27/2007 12:10:00 am
0 Comments:
Post a Comment
<< Home